Ydych chi o dan straen?

Siarad

Mae siarad am y straen yn bwysig iawn. Beth am siarad gyda Dad neu Mam, gydag athro neu athrawes neu gyda ffrind? Mae siarad yn beth da – mae siarad yn gallu helpu!

Symud

Os ydych chi o dan straen, codwch, cerddwch, rhedwch, symudwch.  Mae symud yn help mawr. Mae mynd allan am dro yn syniad ardderchog!

Gwneud chwaraeon

Mae beicio neu redeg neu chwarae gêm tu allan yn wych os ydych chi o dan straen. Rydych chi’n anghofio am y straen – ac yn cadw’n heini. Rydych chi’n teimlo’n well.

Dal peli baoding

Beth am ddal peli baoding yn eich llaw? Symudwch eich bysedd a bydd y peli’n symud. Cyn bo hir, byddwch chi’n teimlo’n well.

Chwythu balwnau

Os ydych chi’n chwythu balŵn, rhaid i chi anadlu’n ddwfn ac mae hyn yn help mawr i chi os ydych chi o dan straen. Felly, cofiwch gario balwnau yn eich bag neu yn eich poced!

Cnoi

Mae rhai pobl yn cnoi gwm cnoi pan maen nhw o dan straen. Mae un arbenigwr yn dweud, “Mae cnoi gwm cnoi yn beth da – mae pobl yn poeni llai, dydyn nhw ddim yn snacio ac mae eu hanadl nhw’n ffres!”.

Bwyta siocled

Mae llawer o bobl yn bwyta siocled pan maen nhw o dan straen – ond mae’n bwysig bwyta siocled tywyll achos mae gormod o siwgr yn gallu creu mwy o straen.