Tîm pêl-droed yr ysgol

Mae’r gerdd yma’n sôn am dîm pêl-droed gwahanol iawn. 

Darllenwch y gerdd a ffeindiwch 10 o bethau rhyfedd am y tîm. Mae’r atebion yn Tasg 1.

 

Tîm pêl-droed yr ysgol

 

Mae tîm pêl droed yr ysgol

   yn dîm twp iawn, mae’n wir –

pob un mewn siwmper gynnes,

   pob un mewn trowsus hir,

pob un yn gwisgo sandals

   neu, weithiau, dwy fflip-fflop

pob un yn gwisgo capan

   â bobble ar y top.

 

Mae deg o fechgyn heini

   yn chwarae yn y tîm.

Mae Joshua ac Alfred

   ac Idris a Yassim.

Mohammed ac Andrea

   a Capten Marc a Cai.

Mae Colin yn y canol

   a’r goli ydy Dai.

 

Mae Josh yn dda am gicio

   a driblo’r bêl fach lwyd.

Mae Dai yn wych am daflu

   y bêl i mewn i’r rhwyd.

Mae Cai yn grêt am gario

   y bêl ar draws y parc,

cyn taflu’r bêl i Idris

   i’w phasio ’mlaen i Marc.

 

Mae tîm pêl-droed yr ysgol

   yn dîm gwahanol iawn,

yn chwarae yn y bore

   a chysgu drwy’r prynhawn.

Ryw ddydd, fe fydd y bechgyn

   mewn gwisgoedd smart i gyd

yn chwarae gyda’i gilydd

   yn nhwrnamaint y byd.

 

Non ap Emlyn

 

Help